Ensuict lusaige de
la precedente figure ou cadran

Pour bien congnoistre par la precedente figure l’heure qu’il sera en chacun endroict que desirerez, premyerement il vous
convyent scavoir par quel degré de haulteur de lattittude le lieu que vous desirerez scavoir demeure loing de l’equinoctial ou le
polle esleve sur l’horison puis posez l’index de la grande roue dessus le degré de la haulteur de lattittude ou eslevatio[n] pollaire
dud[ict] lieu que desirerez scavoir l’heure et vous convient attacher lad[icte] grande roue affin qu’elle ne remeue poinct çà ne là
c’est à dire que l’index dicelle demeure tousjours dessus led[ict] degré de haulteur ou eslevation pollaire. Puis il vous convyent
tenir perpendicullairement vostre cadran suspendu par son anneau et aprez avoir ce faict vous mettrez les deux pinulles
de la lidade qui est dessus le cartier ou triangue au droict du solleil pour y faire passer le ray dicelluy par le trou de
la premiere pigulle qui aille respondre au trou de l’aultre tout ainsy comme sy l’on prenoit haulteur à ung astralabe et
estant ainsy lesdictes pinulles et lidade au droict du solleil, il convyent que le fillet qui est à l’aultre bout dud[ict] triangue
tombe droict en bas avec ung plomb qui soit qui y soit amaré au bout. Puis cherchez entre les deux tropicques le degré que le
solleil est decliné ce jour là loing de son equinoctial par quelle bande que ce soit et nottez bien led[ict] degré de sa declinaison
car ledict fillet thombant à plomb passera par-dessus icelluy degré et allors vous voirrez à lendroict que quelle heure
led[ict] fillet tombera à plomb sur led[ict] degré de la declinaison dudict solleil ce jour là et sera l’heure qu’il sera allors

Comme l’on congnoistra par
ladicte figure l’heure que le solleil se lyeve et couche par tout le monde

ET pour ce voir mettez l’index de la roue dicelle figure dessus la haulteur ou eslevation du polle du pays ou ville à
laquelle vous voullez scavoir le temps du solleil levant ou couchant, puis vous convyent notter la trace et degré que le solleil
est decliné loing de son equinoctial en ce jour là et convoyer lad[icte] trace dud[ict] degré jusques au cercle de l’horison. Et allors
vous regarderez à l’endroict de quelle heure lad[icte] trace dicelluy degré dud[ict ]solleil viendra rencontrer led[ict] cercle d’horison et
par icelle congnoistrez l’heure que le solleil se lyeve et se couche audict pays

Pour trouver la longeur
que contiennent les jours et nuictz artifficiez

Posez le cas que nous ayon le poinct du solleil levant et du solleil couchant sellon la haulteur ou eslevation du polle Comme
dessus est dict, comptez depuis l’heure que ledict solleil se est levé jusques à l’heure de /12/ heures et aurez la moityé du jour
et se vous doublers ledict nombre des heures vous aurez la longeur de l’entier du jour artifficiel, c’est à dire lad[icte] heure
qu’il y a depuis le lever du solleil jusques à son coucher. Et pour scavoir la longeur de la nuict il ne fault que substraire
de /24/ heures lesd[ictes] heures depuis le solleil levant jusques à solleil couchant et ce qui demeurera sera le temps que
ledict solleil detient depuis qu’il se couche jusques à ce qui se leve et occuppe l’emisphere ou demy cercle du monde non veu et ce
temps est la longeur de la nuict

Pour Congnoistre par la precedente
l’heure que l’on a congnoissance du commencement ou affinement du jour

Pour trouver par ladicte figure le poinct du jour ou de l’aube et le vespre que l’on appelle commeunement entre le chien et le loup
prenez le degré en icelle figure que le solleil tient de declinaison loing de son equinoctial en ce jour et suyvez la droicte
paralelle dicelluy degré jusques à l’atouchement de la ligne de l’aube puis regardez les heures qui escheent aud[ict]
atouchement et seront les heures du poinct du commencement et affinement du jour Car les heures de devant midy
vous demonstreront l’aube et les heures d’aprez midy le vespre poinct ou commencement de la nuict

ENSUICT UN NOUVEAU STILLE
Comme l’on pourra prendre la haulteur de lattittude en quelque lieu que
l’on soict à touttes les heures du jour par la figure precedente

Par ladicte figure l’on puist prendre la haulteur de lattittude que l’on est loing de l’équinoctial ou que le polle est eslevé
dessus l’horison en quelque lieu que l’on soit en la mer ou en la terre en touttes les heures du jour en faisant passer les
ray du solleil par les deux pinulles de la lidade du triangue en tenant la demonstrance dicelle figure tousiours supendue
par son aneau affin de voir par lad[icte] lidade estant au droict du solleil ce qui sera esleve. Puis vous convient scavoir par ung
bon cadran lequel soit faict dessus le midy du lieu où vous estes quelle heure il sera allors que vous regarderez l’eslevation
dud[ict] solleil et estant ladicte lidade au droict dicelluy mouvez la roue de la precedente figure jusques à ce que le fillet
qui est au bout du triangue thombe droict à plomb dessus la trace du degré que le solleil est decline en ce jour là loing
de son equinoctial et dessus l’heure que vous cognoistrez qu’il sera allors par vostre cadran. Et thombant ledict fillet
dessus le croisement dudict degré et heure qui sera allors lindex de ladicte roue vous demonstrera dessus le degre
de haulteur de lattittude ou l’eslevation pollaire du lieu où vous estes qui est le vray moyen de prendre ladicte haulteur de
lattittude à touttes les heures du jour et en touttes les pars du monde. Sy ainsy est que l’on ne vist poinct le solleil
estant en son midy ce qui jusques à maintenant avoit este incogneu à tous pillottes navigantz pour plus aisement prendre
la haulteur et eslevation du solleil il la convyent prendre aux heures que le solleil aproche de son midy pource que led[ict] solleil ne
monste poinct sy subittement dessus l’horison estant proche de son midy comme il faict aux heures de son lever