PRATICQUE FAICTE DESSUS LE NOUVEAU
compte faict de ladvancement ou retrenchement des /10 / jours par laquelle l’on congnoistra
en chacun jour de l’an le degré que le solleil est decliné loing de son Ӕquinoctial

Ceste figure cy desoubz mise est tres necessaire au marignier car par icelle démonstrance il pourra aprendre
à faire une declinaison du Solleil ou régime qu’ilz appellent sans en voir ung aultre en observant bien les
mesures de chacun jour bien esgallement compasez dessus ung romd et les degrez que le solleil faict de
decinaison loing de la ligne Ӕquinoctialle comme il appert par la presente demonstrance, laquelle est fort proffittable à tous ceulx qui journellement
hantent la mer. Car sans avoir congnoissance du degré que le solleil est decliné loing de son equinoctial chacun jour aulcuns ne peuvent treuver leur
haulteur de lattittude par led[ict] solleil. Dont pour bien congnoistre par la presente figure le degré que le solleil est decliné loing de son ӕquinoctial
chacun jour sur le nouveau compte faict de ladvancement des / 10 / jours, il convyent notter dessus le tour du romd la trace du jour auquel l’on est
puis il convyent suyvre et convoyer à droite ligne lad[icte] trace de ced[ict] jour jusques à l’attouchement de la ligne diametralle ou graduation des
degrez. Et allors lad[icte] trace vous touchera et fera demonstrance du juste degré que le solleil est décline en ce jour là loing de son Ӕquinoctial

Ensuict le conteneu de ceste
presente figure cy dessus reduict en tables lesquelles les marigniers appellent regime au long
de la declinaison que faict le solleil chacun jour de l’an loing de la ligne Ӕquinoctialle entre les deux
tropicques. Lesquelles tables de declinaisont sont praticquez dessus le nouveau compte faict
de l’advancement ou du retrenchement des dix jours. En icelles tables sont les quatre enneez