Résumé fol. 16vARBALETE ET RECTIFICATION DE LA POLAIRE

+ Pour trouver la hauteur de l’étoile polaire avec l’arbalète quand on ne voit pas l’horizon, on peut utiliser un artifice. On matérialise l’horizon par une barre horizontale fixée sur un bâton vertical ayant la hauteur de l’observateur. C’est ce qu’indique l’illustration qui montre un horizon artificiel.
+ Sachant que l'étoile du nord est à trois degrés et demi du pôle nord et qu'elle fait un tour en 24 heures autour de celui-ci, il faut corriger la hauteur de l'étoile polaire pour connaître la latitude. Son écart avec la hauteur du pôle est évalué grâce à l'orientation des Gardes* de la petite Ourse par rapport à l'étoile du nord.
+ Volvelle de la rectification* de la Polaire. Disque avec un index en forme d'arc représentant la Petite Ourse et centré sur la Polaire.

Comme l’on poura prendre la haulteur
de chacune estoille encores que l’on ne voye l’horizon

Il puist souvent advenir qu’on ne peult prendre la haulteur de l’estoille du nort ou d’aultres estoilles par faulte qu’on ne puist voir l’horizon Car
aulcunes fois la terre couvre le[dict] horison quelque nuée ou vapeur qui monte de l’eau ou bien qu’il faict tant obscur qu’on ne peult voir ledict
horison. Par quoy l’on ne puist prendre nullement la haulteur d’aulcune estoille avec l’arbaleste des navigantz. Maiz pour treuver la
haulteur soit de lestoille du nord ou aultre sans voir l’horison icelluy qui veult prendre ladicte haulteur luy convyent avoir une
verge ou baston lequel soit de la longueur qu’il y a de haulteur depuis ses piedz jusques à son oeuil et à l’un des boutz dudict baston
face une croix au dessus. Et quand il vouldra prendre sa haulteur qu’il joigne ses piedz ne partant poinct d’un mesme lieu puis qu’il
couche sa verge platement puis qu’il la face elever en sa longeur loing de ses piedz et la faire tenir droicte par quelque ung. Et le
bout d’en hault de ladicte verge ou baston où doibt estre ladicte croix luy servira d’horizon en quelque part que il se treuve comme s’il
voyait le bord de l’eau. Et par ce moyen il pourra treuver sa haulteur par l’estoille du nord en faisant le debvoir d’oster ou adjouster
les degrez sellon le lieu où se treuveront les gardes. De l’usage de ladicte verge ou baston s’ensuict une petitte demonstrance

Ensuict combien lon doibt adjouster
ou substraire en prenant l’eslevation à l’estoille du nord sellon le rumb de vent
auquel seront les trois gardes

Il convyent scavoir que l’estoille du nort est eslongee du polle articque trois degrez et demy et faict son tour autour dicelluy en vingt
quatre heures. L’on puist avoir congnoissance de ce que ladicte estoille du nord est au dessus ou au desoubz de son polle et de son monster
ou decente sellon le rumg de vent auquel seront les gardes. Lesquelles gardes font aussi leur circuict en /24/ heures autour dudict polle,
il convyent adjuster ou substraire de ce que l’on aura treuvé ladicte estoille du nord estre eslevee dessus l’horizon sellon le rumb de vent auquel
seront lesdictes gardes, comme la figure cy desoubz le demonstre, et en ayant faict son debvoir de adjuster ou substraire avec ce que l’on aura
treuve ladicte estoille estre eslevee dessus l’horizon le nombre des degrez que ladicte estoille sera au dessus ou au desoubz de son polle. Alors
l’on aura asseurance du nombre des degrez que le polle arctique sera esleve dessus l’horison et autant l’on sera de lattittude loing de l’equinoctial