Ensuict Pour treuver Combien
quelque estoille que ce soit est loing du polle ou de l’equinoctial

Il convyent que les estoilles que l’on desirera scavoir soyent droict en la ligne du droict meridien du lieu où l’on est c’est à dire au plus hault qu’ilz puissent estre
dessus l’horison. Puis il convyent notter la haulteur de lattittude du lieu où l’on est, puis fault regarder par l’astralabe ou arbaleste combien lesdictes
estoilles seront de degrez loing de son zenit ou poinct de /90/. Et autant de degrez qu’ilz en seront loing il les convyent adjuster avec les degrez que
l’on est loing du polle et letout mis ensemble autant lesdictes estoilles seront de degrez loing dud[ict] polle et pour scavoir combien lesdictes estoilles seront
loing de l’equinoctial il convyent substraire les degrez que lesdictes estoilles seront loing de son zenit ou poinct de /90/ des degrez que l’on est loing dudict
equinoctial et ce qui restera autant lesdictes estoilles font leur cours loing dudict equinoctial. Sy lesdictes estoilles demeuroient vers le septentrion il
convyendroict adjuster les degrez que lesdictes estoilles seroient loing de nostre zenit avec les degrez que l’on est de haulteur loing dudict equinoctial et
letout mis ensemble autant lesdictes estoilles seront loing dicelluy equinoctial. Sy lesdictes estoilles estoient vers le midy de soy et que ilz fussent
plus de degrez loing du zenit que les degrez que l’on est loing de l’equinoctial autant qu’ilz se treuveroit plus de degrez autant lesdictes estoilles
auroient de declinaison loing dudict equinoctial en la partie australle ou du su dicelluy. Sy l’on estoit en la partie du su dud[ict] equinoctial en ce
faisant autant lesdictes estoilles seroient en la partie du nort dicelluy equinoctial.

Pour scavoir treuver l’eslevation
du polle ou que l’on est loing de l’equinoctial par les estoilles fixes

Il vous fault regarder que l’estoille par laquelle vous vouldrez scavoir l’eslevation du polle sy elle est droict à vostre meridien car il est de necessitté qu’elle y
soit. Alors prenez l’eslevation dicelle estoille puis vous convyent scavoir par le moyen cy devant combien ladicte estoille est loing de l’equinoctial à
celle fin d’adjuster ou subtraire sa declinaison sy declinaison y a avec ou de son eslevation et ce qui monstera ou restera autant vous serez loing
de l’equinoctial et autant aussy le polle sera eslevé dessus vostre horison. Nottez que sy lesdictes estoilles estoient en la partie du su dudict equinoctial
et que lon fust au nort dicelluy il convyendroict substraire de leur eslevation leur declinaison qu’ilz seroient loing dud[ict] equinoctial et le reste seroit
ce que l’on seroit eslonge loing dicel[luy] equinoctial. Maiz sy lesdictes estoilles estoient en la mesme partie de l’equinoctial comme l’on seroit il convyendroit
adjuster leur declinaison qu’ilz seroient loing dud[ict] equinoctial avec leur eslevation et letout mis ensemble autant l’on seroit loing de l’equinoctial et autant
l’un des polles seroit eslevé dessus l’horizon.

Pour prendre la haulteur
      du polle antarticque qui est de la bande du su de l’equinoctial

Il est besoing scavoir la haulteur du polle antarticque affin que les navigantz ou
quelques personnes qui se treuveront en la partie du su ce puissent gouverner par
icelle. Sur quoy fault scavoir que les marques pour congnoistre la haulteur dud[ict]
polle sont quatre estoilles posez en croix comme sensuict la demonstrance

Lusaige de la Presente Croisee du su

Lon doibt scavoir et entendre que par aller au su cest à dire vers le midy que l’on pert lestoille du nort estant en l’equinoctial. Mesmes en aprochant
dicelluy ladicte estoille du nort est cy peu eslevee dessus l’horizon que l’on n’y puist prendre aysement sa haulteur maiz l’on voit l’estoille de la croisee
du su par laquelle l’on puist prendre justement sa haulteur et voir ce que l’on est loing de l’equinoctial et ce que le polle antarticque se esleve dessus
l’horison. Ces estoilles ne sont de nulz des signes du zodiacque ny des aultres /36/ ymages du ciel parquoy leur nom est la croisee dont l’une des /4/
estoilles est appellee teste l’aultre le pied et les deux aultres les bras dont l’estoille du pied est la plus grande que nulle des aultres et par elle sont cogneues
les aultres. L’on doibt notter que quand ces estoilles sont en croix ayant la teste droicte avec le pied la plus grande estoille qui est le pied est plus
prochaine de l’horizon et allors elle est separee du polle antarticque trente degrez au dessus du mesme polle et doibt en prendre haulteur à ceste
estoille icy et non pas aux aultres. Quand vous voudrez prendre la haulteur à ladicte estoille attendez qu’elle soit en son lieu c’est à dire que
lesdictes estoilles soyent droict de croix, ladicte estoile du pied droict desoubz celle de la teste, et estant ladicte estoille du pied en son lieu prenez sa
haulteur avec vostre arbaleste en la maniere comme l’on prend celle de l’estoille du nort et avisez que sy vous trouvez ladicte estoille estre eslevee
de /30/ degrez dessus l’horison vous estes en l’equinoctial, syl y en a plus de /30/ autant quil y en aura plus serez separé de la ligne vers le su
et sil y en a moins de /30/ autant quil y en aura moins dautant serez separé de la ligne du costé du nord. Comme par exemple je dy que estant
ladicte estoille en son lieu sy jay prins sa haulteur en /40/ degrez lors je diray que je suis separé /10/ degrez de la ligne vers le su. La raison
est pource que l’estoille a /30/degrez de declinaison ou separation du polle, or doncques sy je l’eusse prins en / 30/ degrez le polle eust esté en l’horizon et
quand le polle est en l’horison je suis en l’equinoctial par ainsy les degrez qu’il y a plus de /30/ esquelz j’ay prins la haulteur sont ceulx que je suis
separé de la ligne en la partie du su car /30/degrez quil y a de l’estoille au polle et /10/degrez du polle à l’horizon sont/ 40/ que je treuve de haulteur.
Sy je prens haulteur à ladicte estoille et qu’elle ne soit eslevee que de /20/ degrez je suis separé de la ligne /10/ degrez à la partye du nort et
je la treuve en /10/degrez je suis separe dicelle ligne /20/ degrez et sy je treuve ladicte estoille en l’horizon je suis eslonge /30/degrez de ladicte ligne
vers le nord. Ausqunes fois lon ne puist prendre haulteur à ladicte croisee pource que estant bien areunee en son lieu il est jour et l’on ne la puist voir.
Par l’arbaleste ordinaire l’on puist prendre l’eslevation du solleil et treuver ce que l’on est loing de l’equinoctial en descomptant dessus la fleche de ladicte
arbaleste depuis /90/ ce que l’on treuvera de degrez le solleil estre eslevé dessus lhorizon puis adjuster ou substraire sellon la part où le solleil
sera de la ligne equinoctialle les degréz qu’il en sera decline en ce jour le tout en la maniere comme l’on en use avec l’astralabe ordinairement.