S’ENSUICT LE MOYEN
De scavoir treuver la declinaison que le solleil est loing de
l’equinoctial en quelque jour que ce soit tant en la mer qu’en la terze
Premierement

A lestoille du nort ou à quelque aultre estoille l’on doibt prendre son eslevation et treuver les degrez de haulteur de
lattitude que le lieu où lon est demeure loing de l’equinoctial, puis au midy ensuyvant il fault prendre leslevation
du solleil avec l’astralabe ou arbaleste et y regarder ce que le solleil est loing du zenit ou poinct de /90/ puis convyent
substraire de la haulteur du lieu où l’on est ce que l’on a treuve de degrez le solleil estre loing de /90/ ou bien diceulx degrez
que l’on a treuvé led[ict] solleil estre loing de /90/ substraire les degrez de la haulteur du lieu où l’on est d’un nombre
l’aultre du plus grand nombre le moindre. Et le nombre des degrez qu’il en restera autant le solleil tiendra de
declinaison loing de son equinoctial en ce jour là. Et pour scavoir de quelle part c’est que le solleil faict sad[icte] declinaison de l’equinoctial, sy c’est
du nort ou du su, l’on doibt notter sy l’on treuve le solleil plus de degrez loing de /90/ à l’astralabe que les degrez que l’on est loing de l’equinoctial.
d’autant de degrez quil y en aura plus autant le solleil sera decliné loing de son equinoctial en ce jour là en la partye contraire où l’on seroit dudict
equinoctial. Cest à dire sy l’on estoit au nord de l’equinoctial le solleil feroit telle declinaison en la partye du su dud[ict] equinoctial et sy l’on estoit
au su dudict equinoctial le solleil feroit sad[icte] declinaison au nort dicell[ui] equinoctial dautant de degrez que le solleil est plus loing de /90/ à l’astralabe
que les degrez que l’on demeure loing de l’equinoctial. Maiz sy les degrez que l’on treuve par l’estoille que l’on est loing de l’equinoctial estoient
plus grand nombre que les degrez que l’on treuve par l’astralabe que le solleil est loing de /90/ au midy, dautant qu’il y auroit plus de degrez
autant le solleil est de degrez decliné loing de la ligne equinoctialle en ce jour là en la mesme partye où l’on est dud[ict] equinoctial soit au nort ou au su.
Exemple
Sy je treuves avec mon arbaleste par l’estoille du nort ou aultre estoille que le polle articque me soit eslevé /30/ degrez dessus mon horison c'est
à dire que je suys /30/ degrez loing de l’equinoctial et je prens l’eslevation au midy au solleil avec mon astralabe et je treuve que le
solleil n’est que à /20/ degrez loing de /90/ il me convyent substraire iceulx /20/ degrez trouvez à mad[icte] astralabe que le solleil est loing de /90/ des
/30/degrez que led[ict] polle arcticque est eslevé dessus mon horison ou que je suis loing de l’equinoctial dont il en reste /10/ degrez que je puis dire que
le solleil est decline loing de l’equinoctial en la mesme partye du nort où je suis d’autant que les degrez que je demeure de haulteur loing de
l’equinoctial sont plus que les degrez que ledict solleil est loing de /90/ au midy à mon astralabe
Aultre exemple
Sy je treuve avec mon arbaleste par l’estoille du nort que le polle articque me soit eslevé /50/ degrez dessus mon horison C’est à dire que je
suys à /50/ degrez de haulteur loing de la ligne equinoctialle en la partye du nord et au midy je treuves par mon astralabe que le solleil est /70/ degrez
loing de /90/. Allors je substrais les /50/ degrez que je demeure de haulteur des /70/ degrez que led[ict] solleil est loing de /90/ et je treuves qu’il en reste /20/
degrez que le solleil est loing de la ligne equinoctialle en la partye du su en ce jour là. Voilla comme l’on puist treuver la declinaison que le solleil
tient loing de son equinoctial chacun jour. Ce moyen est incogneu aux navigantz et leur est tres necessaire de scavoir car par ce moyen l’on
puist mesmes retreuver en quel jour l’on est dedans chacun mois que sy les navigantz l’ont oublie ilz ne le peuvent retreuver ny naviguer asseurement.

LA MANIERE DE SCAVOIR
treuver en tout temps quel jour l’on est dedans chacun moys
tant en la mer qu’en la terre

Q uand l’on auroit omblyé son jour et ne sachant mesmes en quel moys cest que l’on est on le puist
retreuver par la maniere cy dessus declaree sachant la declinaison que le solleil faict en ce jour
loing de lequinoctial. Il vous convyent regarder aux tables ou Regime de declinaison quand le
solleil est decliné tant de degrez loing de son equinoctial en la mesme partye que vous avois treuvé qu’il
est en icelluy jour, quel jour il est et par ce moyen vous le pourrez voir par lesdictes tables de declinaison.
Exemple
Je ne scais en quel mois cest que je suis ny quel jour c’est quil est. Pour le scavoir retreuver premyerement
je prens l’eslevation du polle articque par l’estoille du nord ou aultre estoille avec mon arbaleste et je treuves
que ledict polle articque m’est eslevé dessus lhorizon /45/ degrez que je suys loing de l’equinoctial puis je prens l’eslevation du solleil au midy
ensuyvant avec mon astralabe et je treuves que ledict solleil est à /62/ degrez loing de /90/ à madicte astralabe. Allors je substrais les /45/ degrez
que je demeure de haulteur loing de l’equinoctial des /62/ degrez que je treuves le solleil loing de mon zenit ou poinct de /90/ à mon astralabe.
Dont il en reste /17/ degrez que le solleil est decline loing de la ligne equinoctialle en la partye du Su, allors je regardes aux tables ou regime
de declinaison quand le solleil est à /17/ degrez loing de la ligne en la partye du su quel jour c’est quil est et je treuves par lesdictes
tables quil est le deux Iesme jour de febvrier pour ce qu’il y a /17/ degrez à mon regime en ce jour là. Comme je treuves que le solleil
est decline loing de la ligne equinoctialle en ladicte partye de Su. Notter que sy vous treuvez au midy que le solleil vous soit autant