CI.APREZ.S’ENSUICT.
LE.MOIEN.DE.BIEN.USER.DE.LA.
--LONGITUDE—
D’EST.ET.OUEST

Nous devons scavoir et entendre que nous avons ung cercle en la scphere appelé ligne dyametralle ou grand
meridien fixe et passe par les polles du monde et poinctz du ciel touttes fois que le solleil est veneu dorient
jusques en ce cercle, le midy se demonstre droict au su du compas mobille. A ceulx qui sont desoubz icelluy
cercle ou ligne diametralle et touttes fois que ung homme se meult dicelle ligne soit en mer ou en terre vers
orient ou occident il est en aultre midy plus nouveau ou tardif. Et est plustot midy à ceulx qui sont vers
l’orient dicelle ligne et plus tard à ceux qui sont vers l’occident et par ceste différence de meridiens l’on
puist treuver sellon le meridien du lieu où l’on sera combien l’on sera eslongé loing de la ligne dyametralle et sy l’on en est en l’est ou au ouest dicelle
POUR bien user de ladicte longittude il convyent que la ligne dyametralle soit posee aux cartes marines à ung degré au ouest de l’isle de fer
qui est une des isles fortunées appelez canaries et que chacune terre demonstrée par lesdictes cartes soit bien justement posée desoubz son degré de
longitude et lattittude sellon comme lesdictes terres seront loing de l’equinoctial et de la ligne diametralle. Puis quand l’on vouldra scavoir combien l’on
est eslonge de ladicte ligne diametralle il convyent avoir ung compas mobille lequel soit bien justement touché droict nort et su et au tour diceluy
compas soient gradues les /360/ degrez comme l’on feroit aultour d’une astralabe, mesmes au tour dicelluy convyent mercher les /24/ heures et convyent
poser deux filletz droict au mitan du voirre de la boursolle ou bouette dud[ict] compas lesquelz fillez soient droict l’un dessus l’aultre envyron à l’espasse
d’un coup de ligne l’un de l’aultre pour servir de visiere. Dont pour plus amplement avoir intelligence de la roze dudict compas mobille s’ensuict la figure