Pour treuver la longitude
par le Midi que le lieu où l’on sera est loing de la ligne diametralle

Il convyent le solleil estant à son midy et ne monstant plus à son astralabe avoir son compas mobille ainsy compose comme cy devant
est dict. Et fault tourner la bouette dudict compas jusques à ce que l’ombre que les deux filletz feront l’un par l’aultre passe
droict par dessus le centre ou chapelle dicelluy compas. Et y passant allors vous voirrez dessus la graduation des degrez et
heures dudict compas combien de degrez l’hombre desd[icts] filletz passe loing de la poincte du su dudict compas soit vers le suest ou vers le soroest et
autant comme ladicte ombre prendra de degrez d’une part ou d’aultre il en convyendra compter encore autant et letout ensemble autant l’on est loing
de la ligne dyametralle. Puis il convyent scavoir par quel degré de hauteur de lattitude c’est que l’on est loing de l’equinoctial et regarder par la table
des degrez de longitude par latittude cy aprez mise combien chacun degré de longittude vaudra de lieues desoubz le degré de lattittude où l’on sera.
Et autant de lieues qu’il vauldra il convyendra multiplier les degrez que l’on a treuvez que lad[icte] ombre passoit loing de la poincte du su du compas
par les lieux que vault ledict degré de longittude en ceste paralelle. Et estantz multipliez l’on congnoistra par icelle multiplication combien de
lieues c’est que l’on est loing de la ligne dyametralle en la partie où lesdictz filletz auront faict ombre. Si l’hombre c’est faicte dessus les degrez
vers le suest de ladicte poincte du su du compas l’on puist dire que l’on est deux fois autant de degrez en la partye de l’est de la ligne dyametralle et sy elle s’est
faicte dessus les degrez vers le soroest de lad[icte] pointe du su dicelluy compas l’on puist dire que l’on est deux fois autant de degrez au ouest de la ligne
diametralle. Sy le solleil estant à son midy et ne monstant plus à son astralabe, tournant la bouette du compas mobille jusques à ce que les filletz
soient au droict du solleil, sy l’ombre desdictz filletz passant par-dessus la chapelle dud[ict] compas mobille tomboit droict dessus la poincte du su l’on pourroit dire
que l’on seroit droict en la ligne dyametralle

Pour plus amplement
avoir du tout intelligence s’ensuict une exemple

Ce qui se demonstre par exemple est plus facille à entendre qu’autrement. Par quoy sy le solleil estant à son midy et que je voye par mon astralabe
qu’il ne monte plus je prendray mon compas mobille et tourneray la bouette dicelluy jusques à ce que lesdictz filletz soient droict au solleil, que leur hombre
se face droict l’un sur l’aultre dessus le centre ou chapelle de mon compas. Puis je regardes par la graduation de mond[ict] compas combien ladicte hombre se faict
loing de la poincte du su et je voys que l’hombre se faict sur les /11/ heures & ½ c’est à dire demye heure en la partye du suest et du noroest loing de la poincte
du nort et su dud[ict] compas. Pour ladicte demye heure que mon midy cest faict plus prime que sy j’estois en la ligne diametralle il fault que j’en compte
encores autant qui est une heure et je vois par mon astralabe que je suis par les /49/ degrez de haulteur loing de l’equinoctial et par icelluy degré
je treuves par ceste table ensuyvante que une heure emporte /172/ que je puis dire que je suys en l’est de ma ligne dyametralle. Et pour en faire le poinct
en ma carte marine il convyent que je prenne avec ung compas de cuyvre sur les mesures des lieues de mad[icte] carte le nombre de /172/ lieux puis poser
l’une des poinctes dudict compas en la ligne dyametralle et estendre iceux /172/ lieues en l’est dicelle ligne au droict du degré de / 49/ que je suis de
hauteur de latitude, et à la poincte de mond[ict] compas de cuyvre sera le lieu où je seray tant en longittude que latittude. Alors par mad[icte] carte je
congnoistré combien je suys encores eslongé loing de la terre ou port auquel je desires et quel rumd de vent il me convyendra faire pour y aller
qui est le moyen de scavoir treuver en une mesme heure le vray lieu où l’on est. Sur quoy est à notter que le solleil estant à son midy faict son
cours hattivement en degrez de longittude parquoy le convyent prendre justement à son midy et pour congnoistre plus asseurement le degré où se fera
le vray midy du lieu où l’on sera on le puist treuver justement en my partissant les degrez depuis le lever du solleil jusques à son coucher
par moitye. Alors l’on congnoistra en quel degré le midy se faict loing de la poincte du su du compas mobille et de quelle part soit du suest ou du soroest

Ensuict pour treuver par le
lever et coucher du solleil combien l’on sera eslongé de la ligne dyametralle

L’on doibt avoir son compas mobille composé comme cy devant est dict et tourner la boucholle ou bouette dudict compas tant que les
deux filletz qui sont au voirre dicell soyent au droict du solleil levant sur l’horizon, estantz droict l’un par l’autre droict par-dessus le
centre ou chapelle dudict compas mobille. Puis convyent regarder au bord où est la graduation des degrez dud[ict] compas sur quel
degré lesdictz filletz démonstrent le lever dudict solleil, et allors l’on cognoistra sy le solleil se leve droict en l’est ou combien il prendra de degrez du nordest
ou du suest à sad[icte] levee puis ce jour mesme il convyent aussy regarder en la mesme manière que dessus par ledict compas mobille en quel degré ledict
solleil se couche desoubz l’horison et l’on cognoistra s’il se couche droict au ouest ou combien il prendra de degrez du noroest ou du soroest à sond[ict] coucher puis,
sachant ainsy justement les degrez du lever et coucher dudict solleil, il convyendra regarder combien il se treuvera de degrez depuis la pointe du su du
compas mobille plus d’un costé que d’aultre c’est à dire combien il se treuvera de degrez plus vers l’est que du ouest depuis lad[icte] pointe du su jusques au degré
du lever et coucher dud][ict solleil. Et est à notter que s’il se treuve de degrez depuis lad[icte] pointe du su dud[ict] compas mobille du costé de l’est que du ouest autant
de degrez comme il se se treuvera davantaige autant l’on sera loing de la ligne diametralle en la partye d’orient dicelle ligne. Alors convyent scavoir par quel
degré de hauteur de lattitude c’est que l’on est loing de l’equinoctial et regarder par la table des degrez de longitude par latittude cy aprez mise combien
chacun degré de longitude vaudra de lieues par icelluy degré de latittude et autant de lieues qu’il vaudra il convyendra multipier les degrez
treuvez davantage plus du costé de lest que du ouest, et estantz multipliez l’on cognoistra par ladicte multiplication combien de lieues c’est que
l’on est loing de la ligne dyametralle en la partye dorient ou Est dicelle, lequel nombre de lieues il convyent estendre dessus la carte marine en la
manière comme cy devant a esté declare et l’on cognoistra le poinct et lieu auquel l’on sera en sadicte carte marine. Syl se treuvoit plus de degrez
depuis la poincte du su du compas mobille jusques au coucher du solleil qu’il ne seroit depuis ladicte poincte du su jusques au lever dud[ict] solleil,
d’autant qu’il se treuveroit plus de degrez plus dudict coucher que jusques au lever, autant l’on seroit loing de la ligne dyametralle en la partye de
l’occident ou Ouest de lad[icte] ligne et mon midy seroit plus tardif que sy j’estois en ladicte ligne mais s’il se treuvoit autant de degrez depuis
la poincte du Su du compas mobille jusques au lever du solleil comme jusques au coucher, allors l’on pourroit dire que l’on seroit droict en
la ligne dyametralle et que le midy se feroit droict au Su pource qu’il se treuve autant de degrez d’un costé comme d’aultre tant vers l’est que du ouest.
Et sil prenoit plus de degrez plus de degrez (sic) d’un costé que d’aultre depuis la pointe du su comme dict est, d’autant qu’il prendroit plus de degrez
autant l’on seroit loing de la ligne dyametralle du costé dont il se trouveroit plus de degrez

Pour letout entendre plus aisement*

Sy le solleil se leve en l’est deux degrez du suest et qu’il se couche au ouest deux degrez du noroest en comptant depuis le su de mon compas
mobille d’un costé et d’aultre cest à dire de l’est et du ouest vous treuverez plus d’un costé que d’aultre de /4/ degrez asscavoir du costé du ouest