quand nous sommes sur le banc où l’on pesche les moulleues l’estoille du nort y prent /14/ ou /15/ degrez vers le nordest de la fleurdellis de mon compas
et au havre de grace comme devant est dict nous voyons qu’elle prent /13/ degrez du noroest. Dont par ces deux differences l’on puist scavoir la
longittude du chemin qu’il y a d’un lieu en l’autre. Nonobstant que j’ay dict que l’estoille prent /14/ ou /15/ degrez du nordest ou /13/ degrez du
noroest cy esse pourtant que je ne veil pas dire qu’elle se eslonge plus loing de son polle que de /3/ degrez et ½. Et sy ne aproche poinct
plus prez restent quelques minuttes dont en ce regard est peu de chose maiz fault entendre que c’est comme l’on se eschange en l’est ou au ouest de
la ligne dyametralle qui est la droicte ligne d’un polle en l’aultre et pour ce le midy sy faict droict au Su du compas et l’estoille y demeure droict au nord

La maniere de scavoir treuver
la longittude d’est et ouest l’estoille du nort ne estant poinct au droict de son polle

De prendre la longitude à l’estoille du nort et que ladicte estoille ne soit poinct au droict de son polle il convyent adjuster ou
substraire sellon le rumd de vent auquel seront les gardes ce que l’estoille sera à costé de son polle. Comme sy je veulx treuver
ma longitude que je suis loing de la ligne dyametralle par l’estoille du nort et que les gardes soyent au suest de ladicte estoille
sy l’on est au ouest de la ligne dyametralle avec ce que l’on treuvera que ladicte estoille prendra du nordest il convyendra adjuster les /3/ degrez et ½
que l’estoille du nort et au ouest de son polle. Maiz sy l’on est en l’est de la ligne diametralle voullant treuver sa longittude par l’estoille du
nort et estantz lesdictes gardes ainsy au suest de l’estoille, de ce que l’on voirra par le compas que l’estoille du nort prendra du noroest de la
fleurdelis du compas il en convyendra substraire les /3/ degrez et ½ les /3/ degrez et ½ (sic) que lad[icte] estoille du nort est au ouest de son polle.
Il est donc necessaire quand l’on voudra treuver sa longitude par l’estoille du nort scavoir en quel rumd de vent seront les gardes de l’estoille affin de
adjuster ou substraire sellon la part où l’on sera de la ligne dyametralle ce que ladicte estoille du nort sera à costé de son polle comme sensuict cy aprez

Pour scavoir quand
l’estoille du nort est en l’est ou au ouest de son polle

Quand les gardes sont au nordest et au soroest l’estoille du nort est au droict de son polle
Mais quand les gardes sont au nort et aussy qu’ilz sont au ouest l’estoille du nort est en l’est de son polle /2 / degrez & ½
Quand les gardes sont au noroest l’estoille du nort est en l’est du polle /3/ degrez & ½:
Et quand les /3/ gardes sont au suest l’estoille du nort est au ouest de son polle /3/ degrez & ½
Sy les gardes sont an l’est ou au Su l’estoille du nort est à /2/degrez et ½ au ouest de son polle

Ample declaration
de ladicte longitude d’est et Ouest

Sy estant en la mer au ouest de la ligne dyametralle et que je veuille prendre la longitude que je suis loing de la ligne diametralle
par l’estoille du nord, estantz les gardes en l’est ou au su de l’estoille il convyendra adjuster avec les degrez que l’estoille
du nort prendra du nordest / 2 / degrez et ½ que ladicte estoille est au ouest de son polle. Comme sy je treuve par mon
compas mobille que l’estoille du nort me demeure par / 11 / degrez et ½ vers le nordest de la fleurdelis de mon compas il
fault que je adjoustes les / 2 / degrez & ½ que ladicte estoille du nort est au ouest de son polle en la mesme partye où je suis et estantz adjustez
ensemble sont / 14 / degrez que je suis au ouest du polle. Dont m’en fault adjuster encores autant ensemble et sont /28/ degrez que je suis au ouest
de la ligne dyametralle. Puis il me convyent scavoir par quelle degré de haulteur de latittude je suis. Sy je treuves que je suis par les /45/ degrez
de haulteur loing de l’equinoctial par icelluy degré et paralelle de haulteur le degré de longitude vault /12/ lieues /20/ minuttes que fault
multiplier les /28/ degrez que je suis loing de ma ligne dyametralle et estant multipliez il se treuve le nombre de /345/ lieues / 1/3 / que
je suis loing de ma ligne dyametralle au ouest dicelle. et serois envyron /12/ ou /15/ lieues sur le banc où l’on pesche les moulleues. Dont j’en
puis faire le poinct en ma carte marine en la mesme longittude et latittude et sera le vray lieu où l’on sera. Voilla comme l’on doibt user de lad[icte]
longitude d’est et ouest par l’estoille du nort. Nottez qu’il vous convyent regarder sy vostre compaz mobille est bon et s’il se manie bien dessus
son esguille car aulcunes fois les compas se appoisantissent fort ou l’esguille surquoy ilz sont portez se puist reboucquer, parqoy aucunes fois
est necessaire de rapointer leur esguille et estre soingneux diceux compas et qu’ilz soyent tousjours montez dessus leur esguille en ballence mobille

J’ay dict cy devant tant au midy comme à l’estoille du nort que il fault adjuster tousjours autant de degrez comme l’on treuvera que le
midy prent dun costé ou d’aultre depuis la pointe du su du compas mobille et mesmes qu’il fault aussy adjuster encores autant
de degrez comme l’estoille du nort demeurera vers le nordest ou vers le noroest. Cest pource que quand nous regardons l’estoille
du nord et qu’elle prent ainsy d’un costé et d’aultre de la fleurdelis du comps mobille, cest à raison que nous ne regardons
pas ladicte estoille du nort du droict de son polle d’autant que nous sommes à coste dicelluy et pour ceste occasion il les convyent
tousjours doubler de moityé. Dont par le moyen cy devant declaré l’on puist treuver la longittude et lattittude du lieu où l’on est et en estre
asseuré sans en avoir faict aulcune estime qui est une chose bien plus certaine que de naviguer seullement par estyme comme font les pillottes de
nostre temps. Car par ce moyen l’on puist dire en une mesme heure asseurement le vray lieu où l’on est encor que l’on ne seust poinct de quelle
part auroit esté le navire qui est ung nouveau stille tres necessaire à tous mariniers et ceulx qui journellement hantent la mer pour naviguer plus
asseurement en touttes pars du monde et regions loingtaines. Pour desmonstrance de prendre lad[cte] longittude par l’estoille du nort s’ensuict une figure