Fabricque d’un Instrument
pour treuver la longitude de l’est et ouest en quelque terre que l’on soit

D’autant que à juger ainsy au travers ung voirre à veue doeuil seullement comme cy devant a este declaré aulcuns treuveroient
ce moyen difficille encor qu’il soit tres bon tant en la mer qu’en la terre. Dont pour treuver ladicte longittude estant en
terre l’on puist fabricquer soit sur bois ou aultre chose ung rond lequel soit gradué comme ung compas mobille
asscavoir sur le bort dudict romd les /360/ degrez avec les rumgz des ventz et au mitan dudict romd soit une verge
ou suport pour poser dessus icelle une canulle flusté ou serbatane creuse en sa longeur pour servir de visière
et voir par le pertuis dicelle le lieu du solleil estant à son midy et le lieu de l’estoille du nort estant au droict
de son polle à laquelle fluste doibt y avoir ung fillet avec ung plomb

Lusaige dudict Instrument

Quand l’on desirera treuver la longittude que l’on sera eslongé loing de la ligne diametralle en quelque terre que l’on soit, il convyendra poser
l’instrument estant composé comme devant est dict sur trois bastons ou platte forme et convyendra establir la ligne du rumd de vent de nort et su
droict comme l’esguille dun cadran puis il convyent prendre la fluste dudict instrument estant suportee par la verge du centre dud[ict] instrument et
regarder, le solleil estant à son midy ou l’estoille du nort estant au droict de son polle, par le pertuis dicelle fluste. Et par ce moyen estant ladicte
fluste au droict dudict solleil ou estoille du nort alors le fillet qui est ataché à icelle fluste thombant à plomb vous demonstrera dessus le
bort du romd de l’instrument combien de degrez le solleil prendra du suest ou du soroest loing de la pointe du su dudict instrument estant à son
midy et combien aussy l’estoille du nort prendra de degrez du nortest ou du noroest loing du droict nort de la fleurdellis ou demonstrance de
l’esguille du cadran. Et autant de degrez comme ledict solleil estant à son midy ou l’estoille du nort quand elle sera au droict de son polle prendront
de degrez d’un bort ou d’autre dudict droict nort et su, il en convyendra compter encore autant de degrez comme ilz en prendront et letout
ensemble autant l’on sera de degrez loing de la ligne diametralle lesquelz degrez conviendra multiplier par les lieues que vauldra chacun degré de
longittude par le degré de haulteur de latittude que le lieu où l’on sera est loing de l’equinoctial. Et autant qu’il viendra par ceste multiplication autant
de lieues l’on sera loing de lad[icte] ligne diametralle en la partye mesmes où le midy ce faict se faict (sic) loing de la pointe du su. Comme s’il ce faict
vers les degrez du suest l’on est deux fois autant de degrez vers l’est de ladicte ligne et s’il se faict vers les degrez du soroest l’on puist dire
que l’on est deux fois autant de degrez vers le ouest dicelle ligne diametralle maiz sy lestoille du nort demeure aux degrez vers le noroest
l’on est deux fois autant de degrez vers l’est de lad[icte] ligne et sy ladicte estoille demeure par les degrez vers le nordest l’on est deux fois autant
de degrez vers le ouest dicelle ligne diametralle j’entendz quand ladicte estoille du nort est au droict de son polle cest à dire quand les gardes
sont au nordest ou au soroest de ladicte estoille. Dont pour avoir plus ample intelligence de ceste maniere laquelle a esté cy dessus declaree

S’ensuict la demonstrance de lusaige de cest instrument

Ensuict le moyen de scavoir treuver
par le midi du solleil avec le premyer baston treuvé combien l’on est de degrez de haulteur de
latitude loing de l’equinoctial et de longitude loing de la ligne diametralle

Estant en quelque terre estrange et n’ayant aulcuns instrumentz propres pour treuver la longittude et lattittude du lieu où l’on
seroit l’on se puist servir du premyer baston treuvé de quelque grandeur ou petittesse qu’il soit et treuver par l’hombre
qu’il fera, le solleil estant à son midy, la longittude et lattitude du lieu où l’on est. Dont premyerement pour
treuver la longitude par l’hombre dudict baston il convyent faire un romd sur quelque chose que l’on vouldra
lequel soit bien droictement estably et partir ledict romd en quatre parties esgalles as[scavoi]r chacune partye en
/90/ degrez, puis il convyent establir l’une des lignes diametralles dudict romd droict nort et su comme l’esguille
dun cadran est establye, puis il convient ficher le baston droict à plomb le bout dessus le centre dudict romd
puis vous convyent regarder quand l’hombre que fera ledict baston ne appetissera plus qui vous signiffira estre midy. Et allors ladicte ombre vous
demonstrera dessus le bort du romd les degrez que le solleil sera loing de la droicte ligne du nort et su estant ainsy à son midy et vous en convyent
encores autant de degrez ensemble et autant quilz se monteront autant serez loing de la ligne diametralle en la partye contraire où ladicte ombre se
est faicte de la droicte ligne de nort et su, comme sy ladicte ombre ne appetissant plus c’est faicte sur les degrez vers l’horient l’on est deux fois autant
de degrez en la partye de loccident de ladicte ligne diametralle et sy elle s’estoit faicte sur les degrez vers l’occident l’on seroit deux fois autant de degrez
loing de lad[icte] ligne en la partie de l’occident maiz sy ladicte ombre se faisoit droict dessus le nort que le solleil fust droict au su à son midy l’on
pourroit dire que l’on seroit droictement en la ligne dyametralle, dautant que l’hombre ne a poinct prins ny d’un costé ny d’aultre dud[ict] droict nort et su