Par ceste presente figure l’on puist apertement voir par chacun degré de haulteur de latitude ce qu’il convyent faire de lieues pour chacun degré de longitude en
chacune paralelle ou degré de latitude, ce qui se puist voir en nottant dessus le cercle proposé le degré de latitude que l’on est loing de l’equinoctial en le conduisant par lune
des lignes droictes jusques à l’atouchement des mesures des lieues. Alors l’on congnoistra combien de lieues vault le degré de longitude par icelluy degré de latitude notté dessus
led[ict] cercle
Fabricque d’un instrument nomé l’émisphere
marine par laquelle l’on pourra treuver à chaque heure du jour la haulteur de latitude mesmes la longitude le solleil estant
à son midy en quelque part que l’on soit tant en la mer comme en la terre. Et Premyerement,
Il convyent en cest instrument y avoir une table romde et playne nommée l’horison en laquelle table l’on doibt mercher
tous les rumdz des ventz et graduer au bord dicelle les /360/ degrez avec les /24/ heures letout de semblable forme d’un
compas mobille. Dont pour l’establir y convyent aussy poser une longue esguille dun cadran sur la droicte ligne
du rumb de vent de nort et su puis dessus cested[icte] table horizontalle y convyent ériger droict ung demy cercle
méridional estant mobille passant par le zénit auquel y aict ung aneau comme l’on met communement aux astrolabes
et ced[ict] cercle meridional doibt estre aussy gradué comme lesdictes astralabes ass[cavoi]r chacun cartier en / 90 / degrez. Puis il y
doibt y avoir ung aultre demy cercle nommé equinoctial lequel tourne sur deux petitz gondz mis en l’est et ouest de ladite
table horizontalle, et icelluy doibt estre divisé en / 180/ degrez et aussy en deux fois / 6 / heures .Et à ce mesme cercle equinoctial y doibt y avoir ung petit
arc de la declinaison du solleil lequel se coulle à droict angle avec ledict cercle equinoctial auquel sont mis / 23 / degrez & ½ en une partie supérieure et / 23 /
degrez & ½ en l’aultre partie intérieure dudict arc declinantz dud[ict] equinoctial .Puis il convyent y avoir le demy cercle d’altitude avec sa lidade mobille et pinulles
lequel se tourne sur deux poinctz dont cell[uy] de dessus est au zénit du demy méridien et l’autre au centre de la table horizontalle, lequel demy cercle aura
ses deux cartiers divisez en deux fois / 90 / degrez. Dont pour plus amplement avoir intelligence dudict instrument s’ensuict la figure
HEMISPHERE MARINE