Lusaige de lhemisphere marine ci devant figuree
par lequel l’on pourra treuver en chacune heure du jour combien l’on sera loing de l’equinoctial

Rien n’est plus necessaire à tous pillottes et à tous ceulx qui journellement hantent la mer que de scavoir prendre
et treuver la haulteur de latittude que l’on est loing de l’equinoctial à chaque heure du jour veu qu’il advient souventes fois
que le soleil ne se montre au midy maiz bien devant ou aprez. Dont par icelluy hemisphere marine l’on puist
treuver la haulteur de latittude en quelque heure que ce soit en la maniere qui enssuict. C’est qu’il convyent premyerement
tenir cest instrument par son aneau tellement qu’il pende librement respondant aux quatre angles du monde asscavoir
le nort de l’instrument vers le nort du ciel et tous les aultres rumdz des ventz à leur esgallitté ce qui se pourra faire
par l’esguille du cadran qui est posee sur la table horizontalle. Davantaige l’on tournera l’un costé du demy cercle d’a[l]titude
au solleil de sorte que les rayons dudict solleil passent droict par les deux pertuis des deux pinulles de la lidade mobille
et que l’instrument pendant par sondict aneau soit ainsy estably sellon l’esguille du cadran comme devant est dict. Cella faict, mettez l’instrument sur le plant du navire
prenant bonne garde que rien ne se bouje maiz que chacune partie demeure justement dessus les degrez asscavoir la lidade dessus les degrez de la haulteur du
solleil au demy cercle et le poinct du mesme demy cercle dessus son degré en la table horizontalle. Puis il convyent scavoir la declinaison du solleil qu’il tient
en ce jour loing de son equinoctial, et le cognoistrez par le regime ou tables de declinaison. Et ce degré de declinaison notterez sur le petit arc de declinaison
qui se mene et ramene à droict angle en la partie interieure de l’equinoctial asscavoir depuis le /21/ jour de mars jusques au /23/ jour de septembre en la
partie superieure et en l’aultre moitye de l’an en la partie inférieure en cas que l’on soit vers le polle articque. Maiz sy l’on estoit vers le polle antarticque
il convyendroit compter au contraire. Quand le degré de la declinaison du solleil de ce jour là est ainsy notté et que le reste de l’instrument demeure immobile
contournez le demy cercle equinoctial au long du meridien le haussant ou abaissant en tournant, aussy le petit arc de la declinaison sera le bout de
la lidade mobille jusques à ce que ce mesme bout vienne atoucher sur le degré de la declinaison du solleil notté audict arc de declinaison. Et quand tout cecy
sera acordé ensemble vous tiendrez ledict demy equinoctial ferme car il vous monstrera aux degrez du cercle meridien la haulteur du polle de vostre
lieu en commencant à compter les degrez audict meridien depuis le zenit descendant jusques au degré où demonstrera ledict cercle dud[ict] demy equinoctial,
et parce que ce demy cercle equinoctial est divisé en deux fois /6/ heures commencant du poinct oriental .6.7.8.9.10.11.& - au millieu ou en l’angle du
midy puis apres midy 1.2.3.4.5.&.6. en occident vous regarderez cependant que l’instrument demeure encore immobille où larc de la declinaison monstre en
l’equinoctial car elle est la vraye heure du jour. Parquoy n’y a nul instrument plus proffitable pour la mer que est cestuy cy et qu’il soit plus convenable

Lusaige de la dicte hemisphere marine
pour treuver la longitude que l’on est loing de la ligne diametralle par le solleil estant à son midy

Il convyent tenir ledict instrument pendant librement par son anneau et la table horizontalle establye sellon l’esguille du cadran laquelle y est
oposee asscavoir le nort et su comme icelle esguille et tous les aultres rumdz des ventz à l’esgallitté. Puis il convyent tourner le cercle
d’altitude et la lidade de dessus icelluy au droict du solleil tant que les rayons dudict solleil passent par les deux pinulles de ladicte
lidade Et quand vous voirrez que le solleil ne montera plus et qu’il sera midy,estant ladicte table horizontalle ainsy establye co[m]me
devant est dict alors le cercle d’altitude vous demontrera dessus la table horizontalle les degrez ou heures que le solleil prendra du suest ou du sorest
estant à son midy loing de la pointe du su ou demonstrance de l’esguille du cadran, et en convyent compter encore autant ensemble et les multiplier
par les lieues que demonstrent les tables de longitude par latitude, que vault chacun degré ou heure sellon la paralelle du degré de latitude du lieu où lon sera.
Et estantz multipliez autant qu’il viendra par lad[icte] multiplication autant de lieues l’on sera loing de la ligne diametralle en la mesme partye où ledict
solleil aura faict son midy, comme sy le solleil ne monstant plus faisoit son midy à une heure vers le sorest loing de la poincte du su de la table
horizontalle il en convyendroit compter encore autant qui seroient deux heures que le midy se seroit faict plus tard que sy l’on estoit en la ligne
dyametralle puis il convyent scavoir par quel degré de haulteur de latittude l’on est loing de l’equinoctial. Dont si l’on treuve à /45/ degrez de latitude
eslongé dud[ict] equinoctial il convyendra regarder par ceste table ensuyvante et l’on cognoistra que chacune heure emporte /185/ lieues & ½ qui seroit
donc pour les deux heures que ledict midy serait plus tardif le nombre de /371/ lieues que l’on pourroit dire que l’on seroit loing de la ligne diametrale
en la partie du ouest dicelle, d’autant que le midy c’est faict plus tardif vers le sorest de lad[icte] poinct du su ou demonstrance de l’esguille du cadran.
Et voilla tout le vray moyen cy devant declaré comme l’on doibt treuver la longitude de l’est et ouest laquelle a esté de plusieurs plus cherchee que treuvee

Table des lieues que donne chacune
paralelle ou degré de latittude de l’equinoctial pour une heure en longitude

Les degrez de latitude
les lieues marines