Ensuict l’usaige de la figure ci devant
et premyerement pour scavoir en quel signe et degré le solleil et la lune sont en chacun jour

Il convyent poser la premiere lidade du plus petit paneau où est figuré le solleil dessus le jour et moys auquel l’on est et y
estant icelle lidade passera par dessus le signe et degre auquel le solleil sera en ce jour là. Et vous convyent tenir icelle lidade
du soleil ferme dessus icelluy jour du mois auquel vous serez puis tournez la grande roue de desoubz où est figuree la
lune tant que le jour que vous aurez de ladicte lune soit à l’endroict de ceste premiere lidade du solleil. Et alors la lidade
du grand paneau où est figuree la lune vous demonstrera et merchera dessus le signe et degré où est ladicte lune en ce jour là au nouveau co[m]pte

Pour cognoistre par ladicte figure ci devant
l’heure qu’il sera la nuict par la lune sellon le rumd de vent du compas marin

Quand la lune luict prenez vostre compas marin et regardez par icelluy en quel rumd de vent ladicte lune vous demeure puis posez la seconde
lidade de la plus grande roue où est figuree la lune au droict dicelle lune au ciel cest à dire posez icelle lidade au mesme rumd de vent où la
lune vous demeure au ciel et tenez icelle lidade ferme dessus icelluy rumd de vent puis tournez l’aultre lidade de la premiere roue ou paneau
où est figuré le solleil jusques à ce qu’elle soit dessus le jour que vous aurez de la lune cest à dire dessus le nombre des jours qu’il y aura
que ladicte lune aura esté cree. Et alors icelle lidade dudict solleil vous demonstrera dessus le romd des heures lheure qu’il sera pour lors

Brief discours de la lune

La lune ne croist ny appetisse de soy comme il nous semble à nostre veue et fault notter qu’elle n’a aulcune clarté de soy sy
elle ne luy est donnee du solleil. Dont la moitie dicelle lune se encline tousjours et regarde le solleil et est illumynee
dicelluy, maiz l’aultre moitye pour l’espoisseur et obscurté de son corps est tousiours esclipzee et obscure et quant
à l’aparence de nostre veue elle croist et decroist comme en chacun mois lunaire la lune se joinct une fois avec
le solleil et aprez avoir transcoureu les / 12 / signes du zodiacque derechef se conjoinct avec le solleil. Doncques
sellon comme la lune est loing ou proche du solleil parce qu’elle a sa cantitte de lumière tousiours vers icelluy
elle nous appert chacun jour d’une et d’aultre fason et quand la lune est en conjonction avec le solleil nous ne
voyons rien de ladicte lune parce que sa lumiere est en partie superieure c’est à dire en hault regardant vers le
solleil. Dont nous qui sommes icy bas desoubz la partye inferieure dicelle riens nous aparoist et son espesseur et ombragement nous denye la
splendeur dicelle. Maiz tant plus qu’elle se eslonge du solleil tant plus sa clarté nous aparoist et tant plus nous semble qu’elle croist jusques à
sa diametralle radiation et derechef quand elle retourne et aproche du solleil jusques à l’asemblement dicelluy elle se esvanouist au regard de nostre
veue par ce que nous sommes au desoubz dicelle vers sa partye ombragee maiz elle ne lessse pas à estre tousjours à moityé illumynee du solleil.
Maiz pour dire en brief toutte la partye illumynee dicelle regarde tousiours vers le solleil ce qui se puist entendre aysement par cette presente figure cy-
desoubz par laquelle on puist cognoistre l’ombragement de l’espoisseur de la lune et la clarté dicelle comme elle nous aparoist à nostre veue doeuil sellon
comme elle est proche ou eslongee du solleil en son courps lunaire qui est de /28/ jours jusques à lassemblee ou conjonction du solleil et les marines en co[m]pt[en]t /30/

L’assemblee ou coniunction
du solleil & de la lune

La lune croissante		La lune decroissante
Le Croissant		Le Decours
Premier quart de la lune croissante ORIENT ou Levant		Dernier quartier ou Second quart de la lune decroissante OCCIDENT ponent
Laparence de		La lune au Ciel

Diametralle Radiation ou l’opposition
du Solleil & de la lune