Ici est un miroir par lequel l’on
Poura facillement voir à qui le solleil passe par-dessus la teste une fois ou
deux fois l’an et en quelles regions villes ou contrees jamaiz ledict solleil ny passe

Par ce present miroir est demonsré les terres par lesquelles le solleil passe droict par dessus
en chacun jour de l’an. Dont pour ce voir il convient notter dessus le cercle des jours de l’an
le jour que l’on vouldra scavoir et en chacun mois, et en icelluy jour l’on poura cognoistre
par l’atouchement qu’il fera à la lidade des degrez de haulteur de latitude la paralelle et degré
auquel le solleil faict son cours loing de la ligne equinoctialle en ce mesme jour là. Et en faisant
le tour dicelle paralelle et degré l’on pourra voir desoubz icelluy jour et degré la vraye démonstrance
de la terre par laquelle le solleil passe droict par dessus en ce mesme jour. Car il est à entendre
que ceux qui ont leur habitation desoubz les deux tropicques qui sont /23/ degrez et /1/2/ eslongez de l’equinoctial tant en la partie
septentrionalle que meridionalle, qui est le plus grand eslongement que le solleil face dudict equinoctial, le soleil leur passe
seullement une fois l’an droict par-dessus leur teste et ceulx qui demeurent entre lesdictz deux tropicques le solleil leur
passe deux fois l’an par-dessus leur teste mais ceulx qui demeurent hors desdictz deux tropicques et qui sont plus
eslongez dudict Ӕquinoctial que lesdictz /23/ degrez &/1/2/ jamaiz ne voirront passer le solleil droict par-dessus leur teste,
d’autant que le solleil ne se eslonge pas tant dudict Ӕquinoctial comme en est eslongee leur habitation. Ce qui se
puist facillement voir par ceste presente figure cy dessus, laquelle de tout ce discours en faict lesample démonstrance