Ensuit la composition &
manière comme l’on puist descripre & representer le globe
terrestre par chacune moityé de la demonstrance dicelluy
Premyerement pour representer une moityé dudict globe l’on doibt faire ung cercle de telle grandeur que l’on vouldra
lequel representera le Meridien fixe, lequel meridien convyent dyviser en / 4 / parties par deux dyametres dont
chacun cartier de la circonference soit dyvisé en /90/ degrez. Desquelz dyametres l’un soit aplicqué pour la moityé
de l’equinoctial et l’aultre pour la moitie d’un meridien. Duquel diametre les poinctz extremes designeront les
polles du monde. Puis convyent applicquer et tracer subtillement les lignes paralleles des degrez de haulteur de
latitude de / 10 / en / 10 /en lignes courbees sellon leur eslongement ou aprochement de chacun polle et mesmes aussy les
lignes meridionalles des degrez de longitude de / 10 / en / 10 / aussy courbees sellon leur eslongement du centre dicelle
figure. Desquelz meridiens et paralelles les centres seront es lignes dyametralles prolongez droictement de tous costez et d’une mesme ouverture
de compas l’on puist tracer deux lignes meridionalles et aussy deux lignes paralelles. Puis estant la composition dicelles lignes ainsy tracees
sellon leur ordre l’on doibt sittuer chacune terre et region justement chacune soubz son degre de longitude et latitude sellon comme ils sont eslongez
du grand meridien fixe et de l’equinoctial. Dont par ce moyen l’on puist faire demonstrance des terres dune moityé dudict globe comme sensuict la figure
–
+