CI.COMMENCE CE LIVRE PAR
     LA FIGURE ET MIROIR DU MONDE

J’ay faict ceste presente figure pour avoir demonstrance du monde comprenant ses parties asscavoir
le ciel et ce qu’il contient et enclot, non que j’aye voulleu entreprendre de traiter de sy haultes matieres
de beaucoup sur passant mon foible entendement, maiz seullement en declarer autant qu’il est besoing au
marignier d’en scavoir. D’autant qu’en la congnoissance des corps cellestes et de leurs courps et mouvementz
conjonctions et oppositions puissance et gouvernement des choses inferieures vicissitude et ordre admirable selon lequel le createur
de touttes choses les a disposez, consiste le jugement et theoricque de cest art. Dont pour venir à quelque partye du subject est à
entendre sellon les phillozophes que le monde est l’universitté des choses. Il contient terre ciel et mer et tout ce qui est en iceulx
avec tous aultres eslementz qui tout ensemble sont appelez monde estant tousiours en mouvement sans repos et a figure romde
sans commencement ne fin. La pomme ou globe de la terre avec la mer est au myllieu d’icelluy qui n’est que ung poinct au regart
du ciel. Car sy la terre et la mer estoient de grande cantitté au regart du Ciel, il n’aviendroit de voir la moitye
d’icelluy ciel comme on le voit sur l’horison de chacun endroict comme il sera demonstré cy aprez par figure L’ynimitable
ouvrier createur de tout a posé perpendicullairement le globe de la terre avec sa forme romde au millieu affin que le ciel
et les estoiles l’environasent par leurs mouvementz, tellement que icelluy globe est soustenu par sa dyvine puissance estant
environné de l’air suspendu en icelluy. L’on diroit à veue d’œuil que la terre et la mer seroient en plat, maiz c’est à cause de leur cantitté
et grandeur, car l’on saict appertement par plusieurs raisons que la terre sont ung corps rond. De quoy ne feray plus long discours
par ce que plusieurs autheurs y donnent assez ample tesmoignaige de tout le subiect de ceste presente figure