SENSUIT UNE FIGURE
 contemplatisve de la pomme ou globe de la terre et l’eau
 laquelle desmonstre comme aulcuns habittans sont sittuez au regars
 l’un de l’autre, les ungz contre les aultres à cause de la rotonditude d’icelle

À cause de la ro[n]deur du Monde l’on pourroit tant aller suyvant tousjours une mesme trace que l’on reviendroit
au mesme lieu dont l’on serait party. Et l’on passeroit par les anthipodes c’est à dire par ceulx qui habittent droict
desoubz le mesme poinct contraire du lieu dont l’on serait parti. Et l’on pourroit faire le tour du monde en faisant
le nombre de /6300/ lieux de chemin que contient le tour dud[it] globe du monde. Et en quelque part que l’homme soit
il puist faire compte depuis soy jusques au centre de la terre où l’on cuide que ce soit l’abisme ou enffer le nombre
de /1050/ lieux. La mesure de la romdeur du globe de la terre et de l’eau est peu de chose au regard du Ciel et de ce qu’il
contient seullement le solleil est plusieurs foys plus gramd que n’est tout le tour dud[it] globe de la terre. Maiz à cause
de sa haultesse, sa gramdeur ne nous paroit poinct tant gramde comme elle est.

De la figure cy dessus aulcuns se pourroient esmerveiller de ce que les habittans sont ainsy posez que en quelque part
que l’on soit il y en puist avoir d’aultres desoubz soy dessus led[it] globe de la terre, lesquelz font leur cours au contraire
c’est à dire au regard de l’un et l’aultre l’on marche[roit] les piedz les ungs vers les aultres. Ce qui ce faict à cause de la
romdeur dud[it] globe de la terre et l’eau. Davantage l’on se pourr[oit] esmerveiller de ce que l’eau se puist tenir en rond de chacune part ta[n]t
dessus que desoubz led[it] globe. Maiz fault entendre comme dict le phillozofe que touttes pesanteurs tendent naturellement au plus
bas qui est le centre.