De l’horison
L’horison est ung cercle que nous immaginons dessus la face de la terre qui est tant que nous pouvons voir
icelluy cercle orizontal separe la moittie du ciel que nous voyons de l’aultre partie que nous ne voyon pas
Du zodiacque
Zodiacque est ung cercle reallement sittué au huictiesme ciel desoubz lequel le solleil se meut tout le
long de l’annee. Icelluy zodiacque tient de largeur / 12 / degrez de largeur separez par moitie par une ligne eclipiticque
desoubz laquelle est le solleil incessamment. La ligne equinoctialle divise icelluy zodiacque en deux parties esgalles
l’une partie vers le septentrion et l’autre partie vers le midy. Il contient les / 12 / figures et chacun signe contient
/30 / degrez et chacun degré / 60 /minuttes
De la ligne Equinoctialle
La ligne Æquinoctialle est une trace ou cercle immaginé par le meilleur du monde du levant au ponant en esgalle dinstance
des / 2 / polles, tellement que dudict equinoctial jusques à l’un desd[its] polles y a / 90 / degrez.. Icelle ligne est nommee equinoctialle parce
que quand le solleil passe par icelle il faict equinoxe, c’est à dire esgallitté des jours et des nuitz en toutte les pars du monde
De la declinaison
Declinaison est ung separement que le solleil faict par son propre mouvement hors de la ligne æquinoctialle c’est asscav[oir]
six mois de l’an en la partye du nort et six aultres mois en la partie du Su
Des cercles pollaires
Les cercles pollaires sont la voye par laquelle les polles du zodiacque se meuvent entour des polles du monde et prennent
leurs nomps desdictz polles tellement que l’un est appele cercle du polle Articque et l’aultre cercle du polle Antartique et
sont eslongez chacun de son polle de / 23 / degrez & ½ /
Des tropicques
Tropicques sont deux cercles où le solleil arryve seullement une fois l’an en la partye du nort, et une aultre fois en la partie
du su. Lesquels tropicques sont ainsy nommez par ce que quand le solleil est veneu ou arryvé à chacun, il s’en retourne vers
l’equinoctial
De la partie du nort
La partie du nord se prent pour la moitie du monde qui est depuis la ligne Equinoctialle jusques à l’un des polles du monde
vers le septentrion
De la partie du su
La partie du su est l’aultre moitié de la rondittude du monde en la maniere que dessus vers le midi
De la longitude
La longittude s’entent pour la distance qui est du levant au ponant ou du ponant au levant, car c’est la longittude du monde
De la latittude
La lattittude est la voye qui se prent du nort au su ou d’un polle en l’autre car c’est la largeur du monde
Des parallelles
Paralelle est une voye imaginée au ciel, laquelle prent depuis le levant jusques au ponant sans approcher ny reculler de
l’equinoctial ny des polles non plus en une partie que en l’aultre
Du cercle meridional
Meridien est une ligne qui se imagine de l’un des polles du monde à l’aultre et passe droict par dessus notre teste auquel
le solleil y arryvant faict midy à tous ceulx qui habittent desoubz icelle ligne
De l’hemisphere
L’hemisphere est entendu pour la moitié du monde, toutte la sephere se prend pour tout le monde qui est rond
Du zenit
Zenit est ung poinct imaginé au ciel droict dessus nostre teste duquel zenit ou poinct vertical y a / 90 /degrez jusques
à l’atouchement de nostre horison que quelque part que ce soit
Du centre
Centre est ung poinct imaginé au meilleu de la sephere voire sy justement au meilleu que touttes les lignes que l’on tire
sur la sephere de quelque part que ce soit sont divisez par la moitye, et par led[it] centre ou poinct est dict le monde centre des
cielz, tout ce que dessus doibt estre aussy bien imaginé au globe terreste pour l’aide des geographes comme au ciel
Des colleures
Davantaige, il est ung cercle en la sephere lequel se nomme le cercle des colleures. Icelluy est tout ainsy que le cercle
meridional, scavoir est passant par les deux polles du monde, et par l’equinoctial voire couppant le zodiacque par la moitye par
l’endroit desd[its] deux tropicques. Icelluy cercle est à / 90 / degrez de longittude du grand meridien fixe. Et fault notter que desoubz icell[ui]
cercle des colleures que quand le solleil est au midi en la partie d’orient, il est droict au suest au compas marin. aussy
quand led[it] solleil est à son midy desoubz la colleure de la partie d’occident led[it] solleil est au soroest dud[it] compas marin
–
+