Et sy l’on est droict desoubz le grand meridien fixe led[it] solleil estant à son midi, il est droict au su dudict compas marin.
Par quoy considerant tout ce que dessus l’on y apprendra à trouver lad[ite] longittude de chacun endroict. C’est asscavoir en
doublant le nombre des degrez de la difference trouvee entre le meridien de son estgitation [habitation (mot ed. 1584)] et led[it] meridien fixe comme cy
apprez sera amplement declaré
Des nomps Propres des / 12 / signes
Du zodiacque et de leurs commencement ordre et successio[n]
Le zodiacque tient / 12 / signes chacun tenant / 30 / degrez chacun degré / 60 / minuttes et tient en tout / 360 / degrez. On doibt scavoir que le
mouvement que le solleil faict toutte l’année est et se tourne par desoubz les estoilles des signes et quand nous disons que le solleil
est en tel signe se doibt entendre qu’il se porte desoubz les estoilles dud[it] signe. Et pour ce que le solleil sellon qu’il est plus loing ou
plus prochain du poinct vertical jette ses rais plus droitement ou plus oblicquement sur la terre, la challeur et action d’icelluy
est plus forte ou plus debille, sellon comme elle trouve les choses preparez cause plusieurs effectz. Laquelle dyversitté est notablem[ent]
apparence de signe en signe. À ceste cause lesdictz signes du zodiacque ont c[er]tains nomps propres extraictz de la nature et
propprietté des choses convenantes avec lesd[its] effects. Ce qui s’ensuict
Le premyer signe doncques est appelé
/ Aries / pour ce quand le solleil est en icelluy signe il s’aproche lors du poinct vertical dont la
challeur com[m]ence à croistre. Laquelle meslée avec l’humiditté l’hiver precedent rend la temperature de l’air chaut et humide de la nature du mouton
Le second signe est appellé
/ Taurus / car quand le solleil est en ce signe la challeur se fortiffie et commence l’humiditté dont la te[m]perature
de l’air tend aulcunement à secheresse, convenant à la compexion du taureau qui est de plus grande force que le mouton
Le troisiesme est nommé
/ Geminy / à cause que le solleil estant en ce signe la challeur est troublee et est de touttes especes de
bestes, les malles, les femelles s’aproche naturellement deux à deux pour engendrer leurs semblables.
Le / 4 / iesme signe est dict
/ Cancer / car tout ainsy que l’escrevice est une beste qui va au rebous, ainsy le solleil entrant en ce signe
retourne vers l’equinoctial dont il est venu faisantz ses declinaisons contraires vers led[it] Æquinoctial à celles de Gemini
Le / 5 / iesme signe est nommé
/ Leo / pour ce que le solleil estant en ce signe par la reitteration de son irradiation la challeur est
forte et la secheresse gramde. Tout ainsy que le leon est une beste forte et de chaulde compexion
Le / 6 / iesme signe est appellé
/ Virgo / pour ce que la Vierge est une creature debille et de soy sterille. Car le solleil estant en
ce signe la challeur se dymineue et la secheresse domine, dont la production des choses cesse et la terre est faicte sterille
Le / 7 / iesme signe est Nommé
/ Libra / à cause que la disposition de l’air est lors en ballence entre la challeur debille et la (sic)
entre la froideure introduicte et aussi pour ce que le solleil entrant en ce signe les jo[ur]s et les nuictz sont en ballence e[n]tre la diminution et l’augme[n]tatio[n]
Le / 8 / iesme signe est dict
/ Scorpio / car la froidure introduicte avec la secheresse qui lors est gramde sont ennemys de nature et corrompent
l’air qui est chauld et humide de sa compexion dont s’ensuyvent pestes et aultres malladies dangereuses qui surprennent
les creatures comme le venin de / scorpio[n] / qui est en la queue et est engendré de corruption
Le / 9 / iesme signe est nommé
/ Sagitarius / car le solleil estant en ce signe la challeur trop debille est surmontee de
la froidure dont se ensuyvent bruines et gellées et alterations de l’air pernicieuses aux creatures vyva[n]tes comme sagettes envenymez
Le / 10 / [eme] signe est appelle
/ Cappricornus / pour ce que le solleil entrant en ce signe est le plus loing qu’il puisse estre de toutte l’annee
du poinct vertical dont pour la rigeur de la froidure meslee de secheresse qui donne lors la debillitté de la challeur. La
disposition de l’air est lors mellencollicque tenant de la natture du bouc ou chievre.
Le / 11 / [eme] signe est dict
/ Aquarius / pour raison de ce que la secheresse est lors surmontee d’humiditté qui est introduicte devement
qui est subject à neisges, pluyes et froidures. Dont lair est f[r]oit et humide comme l’eau à neisges et pluyes
Le / 12 / [eme] et dernier signe est nommé
/ Pisces / à cause que les poissons frais et humides ensuivent naturellement l’eau
ayans neanlmoins quelque peu de challeur naturelle et que la challeur de l’air est lors froict et humide tenant de la
challeur introduicte par l’aprochement du solleil venant à l’aequinoctial et diminuant la froidure. Par quoy les estoilles fixes
qui sont au long du zodiacque et comprins dedans lesd[its] signes tant d’un costé que d’aultres ont esté redigez et figurez des
anymaux. Ce n’est pas à dire que il y aict des anymaux au ciel, maiz ils sont ainsy appellez pour raison que les effectz
que le solleil oppere estant en chacun des signes correspomdent et imittent ung des anymaux pour proprietté ou substance
Auquelz signes cy dessus l’on a impposé iceulx nomps cy dessus desclarez. Ce qui doibt seullement estre entendu des callitez introduictes
en l’air par la seulle irradiation forte moyenne ou debille du solleil et disposition des choses inferieures sans co[m]prendre
aulcunement les aultres constellations et aspetz des planettes, changeantz et altherantz notablement la disposition de l’air et sans
avoir aussy esgard à l’oppignio[n] des astrollogiens qui pour aultres raisons et princippes dud[it] art donnent ausd[its] signes d’aultres callitez
que les dessusd[ites] ont de la convenance d’iceux signes on peut extraire quatre triplicittez tenantz la co[m]plection des / 4 / eslementz comme s’ensuict
–
+