Résumé fol. 8v et début fol. 9 ERREURS DUES AUX CARTES PLATES

+ Discours sur les précautions à prendre pour parvenir à conserver une latitude constante en utilisant des cartes plates. La base de la méthode est l’observation du rumb de vent suivi quand le Soleil est à midi.
+ Figure, permettant sur un huitième de globe, d’analyser la dérive que peut prendre un navire lorsqu’il cherche à naviguer à latitude constante.
+ Exemple pratique : on cherche à atteindre un lieu à Terre-Neuve.

Advertissement à se donner garde
navigant par les cartes marignes reigles en lignes droictes

Navigant dessus les cartes marignes ordinairement reiglez en lignes droictes il est besoing au navigateur de scavoir en quel
rumd de vent de son compas marin son midy se fera sellon le lieu où il sera à celle fin de prendre tousjours le rumd de vent
lequel croisera droitement led[ict] midy pour entretenir tousjours son eslevation mesmes pour considerer tousjours la difference
des rumdz de vent de son compas sur lequel il navigue. Car sil advenoit qu’il fust fort eslonger de sa ligne dyametralle et
que son meridien fust beaucoup plus prime ou tardif que son grand meridien fixe d’autant plus qu’il en seroit eslongé-
d’autant plus il y auroit de difference aux rumdz de vent de son compas qui ne jugeroient pas bien pour ce lieu là, sy
bien que quand il penseroit aller suyvant ung rumd de vent il yroit en ung aultre. Comme par exemple s’il advenoit que
l’on fust tant eslongé de la ligne dyametralle ou grand meridien fixe en la partie occidentalle et que le solleil ne montant
plus et estant à son midy demeurast au soroest il conviendroit naviguer au suest ou au noroest pour entretenir la haulteur
et eslevation de ce[dict] lieu, sy bien que le su dud[ict] compas marin ne jugeroit que le suest et tous les aultres rumgs de vent
à la demande l’un de l’aultre, ce qui se doibt entendre et exposer dessus la carte marigne qui est tiree à ligne droicte. Pour
aultre exemple sy vous vous trouvez en la partie dorient de lad[icte] ligne diametralle et que vostre midy se face au susuest il
vous conviendra tenir l’est nordest pour entretenir la haulteur du lieu où vous serez et le su de vostre compas ne vous
jugera que le su soroest et l’est ne vous servira que d’est suest et tous les aultres rumdz de vent à leur esgallitté et ne convient
poinct faire aultre compte sur lesd[ictes] cartes reiglees en lignes droictes. Et nottez que tant plus vous serez proche de l’ung
des polles tant plus le cercle est courbé et petit et convient faire moins de chemin pour faire eschangement de son
meridien et tant plus prez de l’equinoctial qui est le plus gramd cercle de la sephere tant plus il convient faire de
chemin pour eschanger sond[ict] meridien. Et y a moins de difference à la ligne droicte parce que led[ict] cercle n’est pas sy
courbé dequoy plusieurs pillottes se treuvent derubz et trompez navigantz par leurs cartes ordinaires reiglees en
lignes droictes tant loing que prez de l’equinoctial où les paralelles ne sont aulcunement observez sellon leur eslongnement
dud[ict] equinoctial et ne considerent pas aussy les differences des meridiens de l’esguille du cadran ou compas marin de quoy
leur advient souvent de grandes faultes

Ensuict une figure laquelle demo[n]stre

La dechet ou tumbe que ung navire peult faire en navigant de quelque part que ce soict. Lequel tumbe se
faict vers l’un des polles en approchant du grand meridien fixe maiz sy lon se esloigne dudict grand
meridien ledict tumbe sera vers l’equinoctial co[m]me il appert par ceste figure ici desoubz mise prenant les lignes droictes
pour ledict tumbe par les parties du nort et les lignes oblicques pour les parties du su